WZC Pawl Lutang hong suahtheih na
Zomite gam leh nam vai na sepna te i et ciang in,zomi min pua in gam leh nam vai na sem ZNC leh ZRA/O bek om in,tua lo chin min tawh CNA,CNF,CHRO leh mizo min zang in MNF cih bang i mu thei hi.
Gam leh nam vai;

Gam leh nam vai na sepna ah zomi min pua in ZNC leh ZRO te ma panna sung ah,mimal in sepna,piakna,tha leh ngal tawh huh theih bang in ki huh ciat a,thupi mahmah a hihi,a hi zong in ki pawlna min tawh khut ki len in na semkhawm cih pen,zomite ki pawlna tuamtuam ZOLUS,ZOMUS,ZYA,ZCLS,LZI cih bang in i tam khit mahmah hang in, gam leh nam vai (politic)saina nei-in,aims and objectives tawh a kalsuan ki pawlna taktak hong om lo a,indirect in gam leh nam vai saina,music,culture,sport etc.. tawh i sawk theih bang tek in i sawk ciat a,manpha mahmah a hihi.A hi zong in Gam leh nam vaisaina  taktak Organization khat kiptak hong din ding pen ki sam mahmah khat om cih thu i sunmang zalmang ah zomi te in i neihdet khat a hihi.
Zomi zogam;
1990 kum ki teelpi lai-in,zomite sung ah lasa siam Cingsan,TSkhaite pawl in,ZNC,ZNC lungtup tui bang tung ta henla zogam hong pal hen..cih la sa in khua tuamtuam ah concert hong bawl uh in,politician te in hantawhna tutung 2010 campagn ki teelpi na bang in restrict speech omlo in, hong neih ziahziah uh teh,zomism hong hat mahmah in vote i pia ziahziah hi.
A hi zong in Pasian zia leh politic zia pen mipi lam pan upmawh sang in hong zekai zawk teh i upmawh loh pi-in kawl galkapte in, thu ki cian neilo,valhtum nopna,salsuahsak nopna leh kawlte bek namlian hihsak nopna lungsim tawh aana ngah i tangmi te thong khiatna,hawlkhiatna,vuakna,satna thuman lopi -in hong neih uh teh,thuman a i tel tangmi teng opposition min hong pia uh in,thumanlo gal kap teng government hong suaksak nop uh ciang in,mipi te ki tavai gawp in, siatna nam tuamtuam a nuai a bang in i phukha zawsop hi.
Kawl Galkapte in Lam tuamtuam pan in hong bawlsiatna;
I gam sung ah ki ukna hoihlo in,1962 pan tuciang dong galkap ukna socialist,facist leh dictatorship tawh ki tatsat lo in,1992 pan in hong siat zawk semsem ciang in,zomite i mailam ding bangmah lametna pha hong om nawnlo a hihi.
Hi bang in gam sung ah ecomomic corruption,social un-rest,religious persucution,rights destructuion,education weakness, restrict freedom,restrict literature,limit self determination cih bang in hong om teh,i gam ah suahtakna bang mah omlo leh khantohna bang mah hong om nawn loh teh,zomite ki lalthang gawp a hihi.
Hi a tung a ki ukna siat man in,i gam leh nam sung ah,nat leh sat,ah ki et zawh lohna unau kal,sum leh pai ki panpih zawh lohna unau kal,pilna siamna ki pattah zawhlohna nu leh pa tate kal ah hong hatluat ciang in,i minam sung ah ki siatna,ki telkhialhna,ki pumkhat mawhna hong piang in, ei leh ei uino suktuah bang in kawl galkapte in lam tuamtuam pan hong suktuah nilohna pan tudong in,gam leh nam vai na semte leh zomi politicians te in, i zomi social life ah mun tang zonawn lo a,hi pen kawl galkapte i hong saltang sakna,hong thahna uh bum ai genocide khaici khat a hihi.
Hih khaici nuai ah zomite in suahtakna nopsakna tuni tan ki muzo lo in,gamsung pan a pua pial zo sun teng puapial in refugee tawh gamdang ki pai a,gam sung a puapial zolo teng zong dictator ukcipna nuai ah refugee gentuak mah in ki om in,zomi te i dinmun koi koi ah i om zong in, galkapte ukcipna nuai ah gentuak refugee in i om laitak a hihi.
Hamphatna ki zong;
Hi bang in gam sung ki ukna hong siat ciang in,politic sem peuhpeuh mat leh hen,vuak leh sat,sihna manna a tuamtuam hong thuak uh ciang in,zomi sung ah gam leh nam vai(politic)a sem a bawl khate,lipkhapna,huat ngaihsutna leh launa in ki nei-in,a mau i manphatna khempeuh kawl galkapte in, mihing bang in hong bawllohna uh hang in,i zomi social mind pen launa (fear spirit) in hong uk cip lai tak zong a hihi.
Tua tawh ki zui-in,i gam lah nuntak haksa,gam leh namvai semte lah lauhuai a hih man in,zomism or nationalism damdam in hong kiam suksuk in,zomism ansang teng bek a cian lai a hihi.Tu hun teh hamphatna,meet-na i ngah theihna ding lampi zong in Kawl galkapte maibiak pawl leh gamdang NGO mai-biak pawl in i ki khenthang a,gam leh nam vai ah ki pumkhatna i neithei kei hi.Hi thute i ngaihsut ciang in,ei hang hilo in,hong ukcip kawl galkapte khaici genocide khat a hihna phawk huai mahmah ta a hihi.
WZC hong ki pat khiatna;
A tung a i gen thute i etciang in,gam leh nam vai ah nitumna leh mun tuamtuam ah zomite i tung zong in launa (fear spirit)kawl galkapte bum ai-in zomite sisan sung ah hong thuk lut lua mahmah ta a hih man in,Politic sai ding ci-in aims and objectives tangko khia leh organization bawl khia hong om zonawn lo a hihi.Hi thu teng zomi leh zogam itna a nei mi pawlkhat ki holimna ki nei-in,bangbang hi leh hi kawl galkapte hong bum-ai uh genocide khaici huihpi pen,koi ci dal in,do ding i hi hiam? hi pen hong pai suaksuak mawk leh a sawtlo khang hun in,zomi mangthang ding,zopau bei ding,zolai bei ding leh zogam ki tan taktak ding a hih man in ci-in, july/04/10 ni-in gamvai saina,zomi activities in diaspora leh zomi activities in zoland na semkhawm vaihawm khawm theihna ding, phualpi plaform khat phut khia ni ci-in,WZC world zomi congress, ei zopau in Zozum ci-in Committee bawl in ki ding khia a hihi.
WZC Phualpi zum koihna;
WZC phualpi zum pen tu laitak a lempen mun ci-in Portland,Oregan ah ki koih a,mai lam ah a lemzawkna a om bang in ki khin ding a hihi.I ultimate goal pen zomite in,suahtakna gam i phuh zawh hun,tu khang,khang sawn leh khang sawnsawn ciang in i zogam ah phuh ding cih a hihi.Tua a hih man in zomi activities in zoland leh zomi activities in diaspora te innpi ding WZC zomite in phuhzo ta suak i hih man in i tangthu manpha mahmah khat i gelh khia zota uh hi.
WZC in gam leh nam saina ah, tulpi hong sep theihna;
WZC pen innkuan kipawlna hilo in, innkuan lutang sem ding zong hilo a hihi.A hi zong in Congress min hong puak tawh ki zui-in,khuasung or gamsung lutang sem in,gam leh nam vai saina ah tulpi na sep sem ding pen a ma mawhpuak hong suak  a hihi.
WZC sung ah department tuamtuam;
Khuasung vai or gamvai saina phualpi a hih tawh ki ton in,Branches by subjects ah department tuamtuam zong hong neih loh phamawh a hihi.
Zomi human rights,Zomi social service,zomi religions,zomi education,zomi literature,zomi music,zomi culture etc..in hong pai ding a,tua bang in na i sepna sung ah nunpi khat in vaihawmna pen zomi leh zogam i it leh i panlak theihna tek pan panlakna i neih ding pen mimal tek mawhpuakna a hihi.
Thukhupna;
Tu hun ciang in zomism nei ki tawm mahmah ta in,ansang zon bang in a ki zong zomite i hi ta hi,tua a hih man in zomi,zogam itna leh lainatna a nei zomism ansang om sun lai teng khempeuh in hanciam in,gam leh nam vai sepna phualpi a hi WZC,ZNC,ZRA i na sepna,tup leh ngim te i tangtun masiah i puah i zun ding pen i  mimal tek mawhpuak hi a,gam leh nam i it leh ki zot leh ki zol kullo in a semkhawm ding te i hihi.A hi zong in mailam hun teh zomi mipi khempeuh in zong zomism hong nei kik ding uh cih pen, gam leh nam vai sem taktak ZNC,ZRA leh WZC te in,note tawh mapang khawm in zogam pallun sak  ding cih pen, mipi te kong lam etna uh lian mahmah a hihi.
By,
ThangLian
WZC Secretary.